काठमाडौँ । आईसीसी टी – २० विश्वकप एसिया फाइनल छनोटका लागि आज देखि सुरु हुने लागेकाे खेलमा आज नेपाल र सिंगापुरबीच प्रतिस्पर्धा हुँदैछ ।
कीर्तिपुरस्थित टीयू क्रिकेट मैदानमा आज बिहान ९ बजे बाट सुरु हुने खेलमा नेपाल सुखद सुरुवात गर्ने लक्ष्यमा रहेको छ ।
खेलहरू त्रिवि मैदानका साथै मूलपानी क्रिकेट मैदानमा हुनेछन् ।
आज अन्य तीन खेल पनि हुँदैछन् । आज बिहान ९ बजे मूलपानी मैदानमा बहराइन र यूएई , दिउँसो साढे १ बजे टीयू मैदानमा ओमान र मलेसिया तथा सोही समयमा मूलपानी मैदानमा हङकङ र कुवेत खेल्नेछन् ।
कात्तिक १९ गतेसम्म चल्ने प्रतियोगितामा ८ देश सहभागी छन् । जसअन्तर्गत समूह ‘ए’ नेपालसहित सिंगापुर , ओमान र मलेसिया छन् । समूह ‘बी’ मा यूएई, बहराइन , हङकङ र कुवेत छन् । नेपालले दोस्रो खेल भोलि मलेसिया र कात्तिक १६ गते ओमानसँग खेल्नेछ |
यस छनोटमा दुवै समूहबाट शीर्ष दुई टोली सेमिफाइनलमा पुग्नेछन् भने फाइनल पुग्ने दुई टोली सोझै विश्वकपलाई छानिन्छन् । फाइनल पुग्ने दुई टोलीले अर्को वर्ष अमेरिका र वेस्ट इन्डिजमा आयोजना हुने टी – २० विश्वकप खेल्न पाउने छन् ।
